\شعر سيد محمد أمينوه

بسم الله وصلى الله على نبيه الكريم. يقول سيدي محمد ولد يسلم ولد امينوه في ذكر مناقب الشيخ سيدي امحمد الكنتي الكبير نزيل فصك، الجد الجامع للدوحة الكنتية المباركة

يَسيدَ امحمَدْ الْكنْتِى ..باحْ

مدْحَكْ ،يسغْناَيْ المَدّاحْ

شاعَرْ طاحْ اعْلَ گَدّكْ ،بَاحْ

بالْخصّرْ منْ لعْمرْ واكْصَرْ

ذَاكْ الْمنّوُ خاسرْ يصْلاَحْ

ؤُذَاكْ الْمنّوُ كاصرْ يجْبَرْ

گَلْبِ فيكْ اصْلاحُ ،واعْلِيكْ

تَكَلْ اصْلاحُ وامْرُ يعنيكْ.

يَشكْرَضَّ ،واصْلاحُ بيكْ.

وانتَ للْكرامَ مظْهَرْ

يظْهرْ بيكْ اصْلاحُ ،خاطِيكْ

گَلْبِ فصْلاحُ ماَ يحْظَرْ.

منْ هُوَّ شيْخْ امْنَ اظْهورَكْ

فتْرَابكْ يحْظَرْ فُمورَكْ

لشْياخْ إِجولُ محْظورَكْ

شيْخْ احْظَرْ فُمورَكْ ينْظَرْ

لَعادْ ابْنورُ منْ نورَكْ

وَ الْفرَعْ امْنَ اصْلُ ،ماَهْ انْظَرْ

مخَلاّكْ أَلِّ غوْثْ اعْطاهْ

اللهْ ؤُگامْ امْنَ ابْتِداهْ

منْ لاَإِلاَهَ إِلاّ اللّهْ

طارَحْ نارْ ،ؤبالذّكَرْ اجْهَرْ

ؤُخَلَقْ اللهْ ادْعاهْ ؤُگَنَاهْ

اصفَرْ واحمرْ وابْيَظْ واخْظَرْ

گَمَتْ امْجاهَدْ فاللهْ،ؤُگامْ

عالَمْ وارثْ سيَّدْ لَنَامْ

انْحَفْظَتْ سَفِينَةْ لَسْلاَمْ

بيكْ ،ؤُ بيكْ ارْساتْ اعْلَ برْ

صَبَتْ امْنَ اللَّ كَبَرْ الْمَقامْ

كلْ انْهارْ امْنَ انْهارْ اكْبَرْ

رَبّيْتْ ابْلَوْرادْ ،ؤُ بمْدادْ

منْ ربْ الْعِبادْ ،الْعِبادْ

وانْقادْ الْسَبِيلْ الرّشادْ

مولْ الْغفْلَ بيكْ ؤُ محْصَرْ

للْجِهادْ،ؤُرامْ أَغَبّادْ

وَارْفَعْ لَذانْ افْكلْ اگْصَرْ

رَگّتْ بِيكْ الدّنْيَ ،وامْتانْ

بيكْ الدّينْ،ؤُ نَارتْ لوْطانْ

واظْهَرْ بِيكْ الْسانْ الْقُرْآنْ.

يبْطَنْ نُورَكْ تَمْ ؤُيظْهَرْ

منْ وادْ الْحبْشِى للدّنْدانْ

لَتْواتْ ،الْوَلاَتَ،لَنْدَرْ

يظْهَرْ نورْ ابْطَنْ فتْراَبَكْ

فأصْحَابَكْ واصْحابْ اصْحابَكْ

ؤُيبْطَنْ فوْرادَكْ واحْزابَكْ

ؤُيظْهَرْ فالْمُريدْ الْيَصْدَرْ

گَدْ الْصدّرْتُ بحْجابَكْ

فتْرابَكْ ماَ يذْهبْ يجْبَرْ

ؤُ گَدْالْصَلّحْتُ ماَ ينْيَ

منْ گَلَبْ ؤُ منْ محْرَدْ واظْهَرْ

ؤُ گَدْ الْظَهّرْتُ باطَنْ يـَ

سِيدْ امْحَمَدْ الْكنْتِى ،يظْهَرْ